Charter Document - 02520455

Wir Heinr[ich] von gotes genaden pfallentz graf ze Reyn vnd hertzog in Baieren enbieten vnsern vitztvmen richtern vnd gemainlich allen vnsern amptlavten vnser hvld vnd allez gvt Wan Seyfrid von Rehpokching aigener man vnd avch amptman des gotshavs ze Raitenhaslach seiner tochter zwo di vns mit aigenschaft zv gehornt zwain chnechten hat gegeben di daz gotshavs ze Raitenhaslach mit aigenschaft an gehornt also swas diselben tochter fvrbas chint gewinnent daz diselben chint vnser vngetailet sein svllen haben wir ze widerlegvng derselben chind dvrch got vnd hail vnser vorvordern vnd vnser des oben genanten Seyfrid svn Frid[rich] dem gotshavs ze Raitenhaslach gegeben in di custrey fver rechtes aigen ewichlich ze haben also daz dazselb gotshavs mit dem oben genanten Friderichen mit heyrat vnd mit allen andern sachen tvn mag allez daz daz si wellent als mit ir aigen mann vnd sol daz gotshavs der oben genant Friderich sein vater Seyfrid noch dehain sein ander frevnt von vns vnd von allen vnsern amptlavten fvrbaz dar vmb vngelaidigt vnbesweret vnangevodert vnd vnangesprochen ewichlich beleiben Vnd dar vber geben wir in den brief ze einem vrchvnd versigelten mit vnserm insigel Der ist gegeben ze Pvrchavsen millesimo CCC vicesimo quarto dez samptztags vor sand Sebastians tag