Charter Document - 02520453

Wir Hainrich herzog in Baieren enbieten vnserm richter ze Trawnstain vnser huld Wan wir daz gotshaus ze Raitenhaslach in vnsern besundern scherm vnd genade genomen haben mit seinen levten vnd guten swa ez dev hat in vnserm lande vnd auch im bechant haben vnd bechennen allev dev recht genade vnd vreitvm dev ez von alten vnd newn dingen hat vnd rechten hintz seinen leuten vnd guten wellen wir ez dar an scherinen vnd behalten daz im dev von dehainem vnserm amptmann nicht bechrenchet werden Da von wellen wir vnd gebiten dir bei vnsern hulden daz dv dez vorgenanten gotshauss abschrift ir hantvest die si habent vnder vnserm chlainen insigel offenlichen verhorest auf den schrannen swann man si zv dir pringe vnd auch im stet habst gar vnd gentzlich swaz die selben hantvest sagent also daz dv dich gehainer recht vnderziehest ze haben oder ze handeln hintz seinen leuten noch guten anders dann sein hantvest stent Tetest dv dar vber anders icht daz wer wider vns vnd wolden auch ez selbe hintz dir pezzern nach der hantvest Der brief ist geben ze Purchausen MCCCXXIII an sant Philipps vnd sant Jacobs tag