Charter Document - 02520452

Ich Chunradt der Potschner vnd mein sun Hainreich purger ze Munichen verjehen vnd tun chundt allen den dy disen briff an sehent oder horent lesen daz vns dy erbern herren her Ilsunchk abbt zw Raytenhaslach vnd all dy samung dez goczhaus ze Raytenhaslach irs goczhaus watgadem habent lazzen oben an dem egk vnder den sneittischen gen dem margt mit der beschaidenhait daz wir in vnd irem chloster jerichlechen do von zins sullen geben ze vnser baider leib zweliff Schilling Municher phening auf sandt Jorigen tag vor oder nach ein den nachsten vierczehen tagen Vnd wenn wir den vorgenanten czins fuderleichen nicht gaben ze der frist alz oben ist geschriben so habent sich veruallen von vnser baider leib allew dy recht dy wir auf dem selben gadem heten oder haben scholten Vnd wer denn dez vorgenanten chlosters herre vnd abbt ist oder wem er ez enphilcht mugen daz selben gadem lassen wem sy wellent Vnd wenn wir daz vorgenandt watgadem nicht lenger verczinsen mugen so sullen wir ez dem selben chloster wider antwurten ein der gut vnd gab do mit wir ez yeczundt von in haben enpfanngen Vnd wir gehaissen in pey vnsern trewn welhez jars wir daz watgadem auf geben daz wir in dez selben jars iren zinss ganczleich sullen geben Ez ist auch also getadingt die weil vnd wir den vorgenanten zins jerichleich geben ze seiner czeit so sullen wir dez selben gadems sein vnuerstossen vmb den selben czins vnd den sol man vns auch nicht meren Daz daz allez stat vnd vnczeprochen beleih dar vmb ze einem vrkunde vnd ze einer statichkait geben wir in disen brieflf mit der stat Munichen insigel versigelten Dez sind czeug Hainr[eich] Rydlar herr Rudolff Berchtold Schrenkch vnd Ludwich der jung Cchnochl purger ze Munichen Daz ist geschehen ze Munichen do man von Christus gepurde czalt drewczehen hundert jar dar nach im dritten vnd czwainczigistem jar dez nachsten freitags nach der osterwochen