Charter Document - 02520449

Ich swester Alhait von Essenpach tun chunt allen den die disen brief ansehent oder lesent horent das mein vatter mayer Fridreich von Essenpach dem got genad mir bey seinem lebentigen leib geschaft het auf seinem gut ze Vnchawfen ze namen fur den chlainen dinst alle jar an sand Gorgen tag fumf vnd zwaintzigt pfening Regenspurger und da mit seinen jartag wegen Die selben fumf vnd zwaintzigt pfening Regenspurger han ich swester Alhait mit meiner bruder vnd frewnt rat geschaft ze rechten selgrat dem conuent ze Raitenhaslach mit der beschaidenhait wer das vorgenant gut zu Vnchofen inne hat das der an alle vrsache es slache der schawer oder pisez geben sol an sand Jorigen tag fur den chlainen dinst dem vorgenanten conuentt fumf vnd zwaintzigt pfening Regenspurger vnd sand Laurenczen abent an dem meins vatter jartag ist sullen die selben pfening vmb vischs dem conuentt gegeben werden Der sache sind zeug mein ohaim bruder Vlreich der Sarsacher ze Raitenhaslach Fridreich der amman von Essenpach vnd sein sun Hainr[eich] Rueger Vlr[eich] mein bruder Hainr[eich] der Essenpekch mein bruder Vlr[eich] der Swarcz mein swester Jeut von Westen vnd der selben tochter swester Gedrawd Chunigunt vnd Jeut die Scharsacherinne vnd ander bider lewt mer Vnd wan ich aigens insigel nicht enhan hat durich mein vnd durich meiner frewnt willen vnd gebet der ersamme man Vlr[eich] der Roraer von Merschofen sein insigel an disem brief gehangen yem an allen schaden ze vrchund diser sache Der brief ist geben ze Lanntzhwt da von Christes gepurd vergangen waren drewzehen hundert jar dar nach in dem zway vnd zwaintzigistem jar an sand Bendicten tag in der vasten