Charter Document - 02520448

Ich Ernreich puriger ze Pyburch vergih vnd tun chunt allen den di disen prief sehent lesent oder horent daz ich nach miner gwissen vnd nach miner sel hail vnd salde da ich dannoch wol pei mir selben vnd pei minem witzen pin gewesen also min geschaft han getan als her nach verschriben ist Des ersten han ich minen sun Rugern verricht seins hairatgutz dreisich phunt Regensp[urger] phenning vnd han im dar vmb in geantwurt minen hof ze Vilsatleren mit der beschaidnhait daz ich vnd min hausfrawe vns behalten haben den gwolt den selben hof wider ze rechter losung zeit wider ze losen alz getaidingt ist vnd sol er vns dar an nicht irren noch engen Dar nach han ich geschaft minem sun Albrechten als vil daz sint auch dreisich phunt Regensp[urger] phenning der man in fuderleich verrichten sol von miner hab Dar nach minen zwain enichlaien mins suns Ludw[eig] chint dem got genad dev hub datz Naitzhaim di suln auch pei miner hausfrawen belaiben wesnleich Dar zu minem liben sun prvder Hainr[eich] ze Raitnhaseleich ist ob ich oder min hausfrawe den hof ze Satlarn von minem sun wider losen vmb di phenning dar vmb wir im in geantwurt haben ein phunt Rengsp[urger] phenning aus dem selben hof pei vns lemptig vnd vnser nach paider tod sol der selb genant hof pei dem gotzhaus beleiben ebichleich vns vnd vnsern erben zu einem selgred Swos dar vber wir belaibt dez sei vil oder wench oder vber wirt daz han ich lauterleich miner liben hausfrawen geschaft vnd sol ir sein vntz an ir tode vnd sol dhain min erbe sei dar an engen vnd sol vnd mag auch si da mit tun vnd schoffen pei ir lemptig vnd nach ir tod daz si wil vnd ir nutzz vnd gut ist paidew ir leib vnd ir sele Vnd pei dem vorgenanten geschaft ist gewesen di ersam laut her Seifrit Smautzhauser pfarrer ze Pyburch her Hartman vnd her Seif[rid] sein gesellen her Heinr[eich] der Seybotzdorfer her Manigos her Haug her Perichtolt di Seibotzdorfer Martein Velber Ortlieb der Pochner H der chaufman sein aidm Alb[er] Swobenfleisch H der Chargl vnd min ped sun vnd ander pider laut Dat et act anno domini MCCC vicesimo secundo in vigilia beati Gregori pape Vnd der prief ist verinsiglt mit mins herren insigl dez vor genanten pfarrer ze Pyburch vnd mit minem insigl