Charter Document - 02520444

Wir Heinreich Ott vnd Heinr[eich] von gotes genaden pfallentz grafen ze Rein vnd hertzogen in Baieren verjehen offenbar an dem brief wan der ersam abbtt Illsunch vnd der convent ze Raitenhaslach svmlichev irev gut vnd vrbor dev her nach benenet sint daz ist in vnserm gericht in dem Grazzawertal zwai ze Vberse eines in dem Albrach vnd Aich vnd in dem Chiemkaw in vnserm gericht ze Trawnstain einen hof ze Sazzawe vnd ein gvt ze Nvstorf durch ir notdurft ze dienst habent gelegt daz man in vische da von dien der si zv ir pfrvnt bedurffen in dem adventt vnd in der vasten vnd ander zeit Vnd wan wir gotes dienst in demselben vorgenanten chloster ze Raitenhaslach alle zeit meren wellen vnd fudern haben wir ze selgeret vnser lieben mvterlein frawn Jevtten der got genad vnd auch durch vnser vnd aller vnsrer vordem vnd nachchomen hail vnd seld dem oben genanten abtt vnd dem conuent vnd auch ir holden di auf den oben genanten ir vrborn sitzen in den vorgenanten vnsern gerichten nach vnsers rates rat erlavbet vnd gegeben den vischauf bei den Chiembse vnd auch erlauben vnd geben in mit disem brief daz si furbas ewichlich desselben chauffes von vns von vnsern nachchomen vnsern amptlevten vnd von vnsern vischern vnd vischchevffeln vnd von allen den vnsern allen weis vnengolten beleiben Vnd daz in daz alles gantz stet vnd vnzebrochen beleih dar vber ze vrchvnd geben wir in den brief versigelten mit vnsern insigeln Der ist gegeben ze Pvrchausen da von Christes geburtt waren tausent jar drev hvndert jar vnd dar nach in dem zwaintzkisten jar an sand Elspeten tag