Charter Document - 02520443

Wir Hainrich Ott vnd Hainrich von gots gnaden pfallentz grafen ze Reyn hertzogen in Bayeren vergehen offenbar an disem brief daz vns der ersam abt Illsvnch vnd der convent ze Raitenhaslach mit alter vnd gvter chvntschaft vnd gewissen ze engagen vnsers rates habent geinnert vnd beweiset das si vnd ir gotshavs den zehenten ab vnsern chasten ze Weilhart vnd ze Oting von aller vnsrer gvlt chlainer vnd grozzer dev wir haben oder gehaben mvgen in vnsern vorgenanten gerichten ze Weilhart vnd ze Oting haben svln vnd enpfahen jarleich an alle vnser vnd vnser amptlevt irrvng Vnd wan wir daz ob genant gotshavs ze Raitenhaslach alle zeit fvdern wellen vnd im seinev recht meren vnd minder bechrenchen stetigen wir im mit disem brief nach vnsers rates rat durch vnser selber vnser vordem vnd vnsrer nachchomen hail vnd selichait dev vorgeschriben recht des zehenten von vnsern chasten baiden ze Weilhart vnd ze Oting daz in der jerleich gevalle gar vnd gentzleich von aller vnsrer gvlt chlainer vnd grozzer dev dar avf gehort ez sei getraide pfenning swein oder ander gvlt swelherlaye dienst ez sei an alle vnser vnd vnsrer amptlevt irrvng vnd widerred Swaz avch wir vnsers vrbors verchvmbern oder swie wir daz avs vnsrer gewalt antwurten daz in den obgenanten gerichten ist gelegen da von sol der zehent dem gotshavs dannoch gevallen swer ez inne hat in allen den rechten als ob ez avf vnser chasten dient Vnd dar vber ze vrchvnd geben wir disen brief versigelten mit vnsern insigeln Der ist geben ze Pvrchavsen da von Christes gepvrt waren tavsent jar drevhvndert jar dar nach in dem zwaintzkisten jar an sand Elspeten tag