Charter Document - 02520439

Wir Heinrich Ott vnd Heinrich von gotes genaden pfallntz grafen ze Reyn hertzogen in Baieren vergehen vnd tvn chvnt allen den die disen brief sehent oder horent lesen daz wir ze engagen alles vnsers rates gesehen haben chvntleich vnd gelesen vnsrer hertzenlieben vater vnd vetern chvnig Otten hertzog Stephans vnd hertzog Lvdweigs den got genade brief an dem si habent erchant vnd bestetigt dem gotshavs ze Raitenhaslach alle die genade vnd die vreitvm vnd dev recht dev der stvl von Rom vnd die chaiser vnd die chvnig vnd vnser vorvodern dem orden von Cytel vnd dem vorgenanten gotshavs ze Raitenhaslach habent gegeben vnd habent verboten an dem selben brief allen iren amptlevten vnd iren richtern vnd Schergen daz si daz vorgenant gotshavs vnd alle sein levt vnd gvt nicht svln noch getvrren beswern noch laidigen mit herbergen mit fvtern noch mit dehainem dwanchsal noch avch die richter svln nicht twingen des egenanten gotshavss ze Raitenhaslach vnd des conventes da selben levt avf dehain taydinch vmb dehain sache noch vmb dehain recht wan si selbe daz vrlavb habent vnd den gewalt daz si alle die sache horen die ir levt an gent vnd so si die gehorent daz si die selben sache mit vollem gewalt mvgen vnd svln richten an als vil ob dehain des gotshavss man wurd begriffen mit sogetanen Sachen daz man mit dem tode vber sein leben sold richten wan gaistleich orden sogetan gerichte nicht tvrren getvn so sol der richter den selben man nemen alein als er mit der gvrtel ist begriffen vnd sol alles daz gvt daz der man hat varent vnd vnvarent dem gotshavs beleiben Vnd wan wir vnsrer hertzenlieben vater vnd vetern seligen brief gesehen haben vnd die andacht bechant die si gen got gen vnsrer frawn vnd gen dem gotshavs ze Raitenhaslach habent gehabt die wellen wir nicht minnern svnder wir wellen si mit gantzem willen vnd besvndern genaden meren vnd volfvren Davon gebiten wir allen vnsern amptlevten vitztvmen richtern vnd schergen swie si genant sint die jetzv vnser amptleut sint oder furbaz werdent daz si alle des gotshavss levt von Raitenhaslach swa ez si hat in allem vnserm lande nicht getvrren noch svln besweren noch laidigen mit herbergen noch mit fvtern noch mit dehainer voderung twanchsal noch svchvng chlain noch gros Swelher richter oder scherig daz vberget so sol der richter vns geben ze pvzze zehen pfvnt pfenning der scherig fvmfev vnd sol dem gotshavs seinen schaden abtvn Wir gebiten avch allen vnsern richtern schergen vnd amptlevten swie si sint genant in allem vnserm lande daz si dehainen des gotshavss man nicht bedwingen noch gebiten ze chomen avf dehain ehaft taydinch noch avf dehain besvnder taydinch wan von altem recht vnd von vnsern besvndern genaden vnd gab si den gewalt habent vnd svln haben daz si alle die sache svln horen die ir levt angent swa si die habent in vnsern gerichten ze Piburch bei der Rot ze Weilhart ze Oting ze Mermos ze Walde ze Travnstain vnd in dem Grazzawertal vnd swa si anderswa in allem vnserm land levt oder gvt habent vnd so si die verhorent so svln si mit vollem gewalt richten Swelich richter oder scherig der sache dehainev vebervert oder zebrichet als dikche er daz tvot so sol vns der richter zehen pfvnt geben vnd der scherig fvmfev vnd dem gotshavs seinen schaden abtven Geschech aber daz daz des gotshavss man sogetan mizzetat tet darvmb man richten sold vber sein leben mit dem tode so sol der richter den selben man nemen als er mit gvrtel bevangen ist vnd alles daz gvt daz er hat varent vnd vnvarent daz sol dem gotshavs beleiben Nem aber der richter gvt fver seinen tot des sol der richter des gotshavss geschol sein sam er ez genomen hiet avz einem bruderhof Vber die sache alle verbieten wir allen den vorsprechen vnd taydingern die in vnserm lande sint bei dem ayd vnd fvmf pfvnden daz si immer icht getaidingen oder ertailen wider allen den vreitvm vnd wider dev recht dev wir dem gotshavs ze Raitenhaslach erchant haben als oben ist verschriben vnd im gevestent haben mit vnsern briefen Avch binden wir vns darzv vnd geloben bei vnsern genaden daz wir alle vnser richter vnd schergen darzv betwingen mit den wandeln dev vor benant sint daz si behalten dem gotshavs von Raitenhaslach allev dev recht vnd vreitvm vnd die genad die wir im haben bechant als oben ist verschriben vnd dev avch wir im vnd vnserm getriwen abt Illsvng vnd seiner sammvng haben gegeben Ist avch daz man des gotshavss man einen ansprichet vmb aigen vnd vmb lehen vnd daz daz selbe aigen vnd lehen des mannes ist den man darvmb ansprichet vnd nicht des gotshavss der sol daz recht vor vnserm richter tvn vnd nicht vor dem abt an die levt die des gotshavss inwertz aigen habent daz sol der abt der danne ist selbe richten wan die selben levt beidenthalben des gotshavss sint Ez ensol avch dehain vnser richter nicht richten von des vorgenanten gotshavss aigen Vnd daz im daz alles stet gantz vnd vnbechrenchet beleihe ewichleich geben wir dem obengenanten gotshavs ze Raitenhaslach zv einem waren vrchvnd disev hantvest versigelt mit vnsern insigeln Daz ist geschehen ze Lantshvt da von Christes gepvrt waren tavsent jar drevhvndert jar darnach in dem achtzehenten jar an sand Thomas tag