Charter Document - 02520438

Ich Ekkolf von der Wartt vergich vnd tvn chunt allen den die den brief sehent oder horent lesen wan Heinr[ich] der Snitzer von Purchavsen einen avzwechsel hat getan mit dem gotshavs ze Raytenhaslach vnd hat im gegeben drev gvt ze Ehmvting dev er von meinem aydem Chvnr[at] dem Taufchircher zelehen hat gehabt des pfleger ich bin vnd avzgewechselt vmb zwai gvt ze Obernserleich dev des gotshavss aygen vntz her sint gewesen dev avch er nv von meinem aydem ze lehen genomen hat gib ich dem vorgenanten gotshavs ze Raytenhaslach mit vollem gewalt als ein pfleger mit gvotem willen meines aydem dev lehenschaft der dreier gvt ze Ehmvting vnd stetig im dev selben gvt mit samt meinem aydem ze rechtem vnd vreyen aygen ze besitzen vnd nizzen furbaz ewichlich besucht vnd vnbesucht vreilich vnd ledichlich als ander sein altes vnd vreies aygen also daz ich noch mein aydem der Taufchircher noch dehaine vnser erben oder nachchomen fvrbaz nimmer mer dehain ansprach dar nach gehaben noch gewinnen Vnd ze vrchvnd gib ich dem vorgenanten gotshavs mit samt meinem obengenanten aydem disen brief mit meines lieben herren hertzog Heinr[ich] insigel der nach meiner pet ze einer merern stetichait ez dar an hat gelegt vnd mit dem meinen versigelten dar vnder sich mein obengenanter aydem wan er insigels noch nicht hat diser sache vnd tayding hat verpunden Daz ist geschehen ze Lantshvt da von Christes gepvrt ergangen waren tavsent jar drew hvndert jar dar nach in dem achtzehenten jar des nechsten svnntags nach sans Seruacii tag