Charter Document - 02520436

Ich Leupolt Stainhofer von Vberechen vergih vnd tun chunt alle den di disen brief lesen horent daz ich dev Mitterhvb auf dem perg ze Vberechen di her Fridreich der Pravnawer dem got genade dem gotzhous hintze Raitenhaslach ze Selgeret ledichleichein pei im lembtigen langs vor seinem tode gegeben het der ich mich ze vnreht mit eribreht vnderwunten het vmpilleichein vnd wider meiner sei hail als mich der erwerig herre abt Ilsunch von Raitenhaslach wol geweiset hat han ledichleicheim vnd gentzlichein dem selben gotzhous Raitenhaslach auf gegeben mit aides weis auf vnser frawn vnd aller gotes heiligen alter in dem mvnster ze Raitenhaslach mit gutem willen an allev gwanchsal also daz furbaz weder ich selben noch dehain mein erib oder freunt nach der hvb oder auf di selben hub nichtes nicht ze sprechen oder ze chrigen haben ich hab reht oder vnreht vor gehabt Der sahhe sint zevch der Fridreich von Vberechen Ditmar Ranshofer amptman H[ainreich] der scherig von Purchousen Chunrat der prew von Winchel H[ainreich] auf dem pvhel Ch[unrat] vnd Pilgreim von Swal Ott auf dem perg H[ainreich] vnd Seybot von Mitterhofen Fridr[eich] von Garnweiden Fridr[eich] von Reut Rudger der Grutsch Ch[unrad] auf dem vinsterlehen Perhtolt von Weng Ch[unrad] von Dornperg Fridr[eich] der Darm Ch[unrad] der Rumpler H[ainreich] der Treu Seifrid der probst Ch[unrad] der Ditler vnd ander pider leut mer Vnd wan ich Leupolt Stainhofer nicht aigens insigels han han ich meinen herren den vicedum herren Albrecht den Nevnchircher dez erbeten daz er zv einem ewigen vrchunt dirr sahhe hat sein insigel an disen brief gehangen Der brief ist gegeben an sant Vincencii tag anno domini MCCC octavo decimo