Charter Document - 02520435

Ich Hainreich der Orter von Pfeffing vergich vnd tvn chunt alle den di disen brief sehent oder horent lesen daz ich mein ledigez vnd vreiz aigen daz da leit ze Pfeffing in Pvehchircher pfarr gentzleich als ich ez inn han gehabt besvcht vnd vnbesvecht gegebn han vnser vrowen vnd dem chloster ze Raitenhaslach fvrbaz immermer ledichleich zu habn durch meiner sel hail willen vnd aller meiner vorvodern rehtem selgeret Vnd daz demselbn chloster daz selb gvt daz ich selb auf vnser vrowen alter geselt han vnd auf gegeben immer mer an allen chriech fvrbaz aigenchleich beleihe gib ich dem egenanten chloster ze Raitenh[aslach] disen brief wan ich selb niht insigels han mit hern Albrehts des Nevnchirchers insigel ze den selbn Zeiten vitztvms bei der Rat vnd mit den gezevgen die hie geschribn stent Daz ist her Chvnrat des pfarrer geselle ze Bvrchausen her Fridreich der mautner ze Bvrch[ausen] Vlreich der mautschreiber daselb Fridreich der Darm Chvnrat Rvmpler Hainr[eich] der Pvchs Niclas Hainr[eich] der sneider Chvnr[at] Titler des chlosters diener ze Raitenh[aslach] vnd ander frvme levt di da bei gewesen sint Diser brief ist gegeben da von Christes geburt waren tausent jar drev hvndert jar vnd in dem ahtzehenten jar an sand Vincencen tag