Charter Document - 02520433

Ich Lvdweich der jvng Grans vergich vnd tvn chvnt allen den die disen brief sehent oder horent lesen wan der ersame abt Illsvnch von Raitenhaslach gezaiget hat vnd fvrpracht meinen lieben herren herm Heinr[ich] vnd herm Otten den edeln hertzogen in Baieren vnd ir rat die hantvest die daz gotshavs ze Raitenhaslach von ir vodern vnd von herm Ortlieben von Walde vnd seinen vorvodern den allen got genade vber dev gerichte dev ez hintz seinen levten vnd gvten in den gerichten Walde vnd Mermos hat dev si im mit ir briefen avch gestett habent vnd avch er mein vorgenant herren hat beweiset daz mein vater her Lvd[weich] der alt Grans da er dev vorgenanten gerichte Walde vnd Mermos warbe von meinem herren chvnig Otten dem got genade dem vorgenanten gotshavs mit des selben meines herren des chvniges wizzen seinev recht bechant dev ez in den selben gerichten hat daz ist daz ez gewalt hat ze richten hintz allen seinen levten vnd gvten die in den obengenanten gerichten sint vmb alle sache wan vmb die sache alein die hintz dem tod gent bechenne avch ich dem obengenanten gotshavs ze Raitenhaslach seinev recht dev ez hintz seinen levten vnd gvten in den obengenanten gerichten Walde vnd Mermos hat nach seinen hantvesten alten vnd newn vnd widersag vnd gesten avch gar vnd gentzleich von aller der ansprach dev ich oder meine erben oder dehain vnser richter oder amptman hintz seinen levten oder gvten mit gerichte mochten gehaben wan alein swaz hintz dem tode get daz sol ich hintz dem schuldigen mann richten wan als er mit gvrtel vmbvangen ist swaz er gvtes hat daz sol dem gotshavs beleiben vnd sol ich mich dez noch dehain mein amptman nicht vnderziehen chlain noch groz wenich oder vil Daz im daz also stet beleihe vnd vnzerbrochen gib ich disen brief mit meinem vnd hern Seifrid von Puchperch meiner herren der hertzogen hofmaister ze merer gedenchnvzze insigeln versigelten Diser sache sint zevge her Hartl[ieb] von Puchperch her Jorig von Chabers her Frid[reich] meiner obengenanten herren der hertzogen Schreiber vnd Vlreich der Ekker Dev taidinch sint geschehen ze Landshvt da von Christes gepvrt ergangen waren tavsent jar drev hvndert jar dar nach in dem achtzehenden jar an sand Erhartes tag