Charter Document - 02520432

Wir Heinrich vnd Ott von gotes genaden pfallntz grafen ze Reyn hertzogen in Bayern vergehen offenbar an disem brief daz wir ze engagen alles vnsers rates chvntleich gantz vnd allen weis vnbechrenchet gesehen haben vnd gelesen die hantveste die daz gotshavs ze Raitenhaslach von vnserm vrenen hertzog Otten vnd vnserm lieben enen hertzog Heinr[ich] den got genade vnd auch von baiden Ortlieben von Walde dem alten vnd dem jvngen hat dar an wir mit gantzer worhait erfvnden haben daz daz selbe gotshavs gewalt hat ze richten hintz allen seinen levten vnd gvten in den gerichten ze Walde vnd ze Mermos vmb alle sache wan swaz hintze dem tode get da sol der richter den schedelichen man nemen wan als er mit der gvrtel vmbvangen ist vnd sol alles daz gvt daz der man hat varent vnd vnvarent dem gotshavs beleiben So hat avch daz selbe gotshavs von newn dingen dev selben gerichte mit dem gemainen chavffe der gerichte geraichet in den oben genanten gerichten als anderev gotshevser vnd alle levt in vnserm lande swie ez doch von alten dingen dev recht hiet in den oben genanten gerichten als vor bervret ist Vnd da von wan wir dem oben genanten gotshavs ze Raitenhaslach allev seinev recht mit dehainen Sachen nicht wellen minnern svnder wir wellen im dev mit gantzem willen vnd besvndern genaden durich vnser vnsrer vodern vnd nachchomen hail gern erchennen meren vnd volfvren stetigen wir im mit disem brief nach alles vnsers rates rat vnd willen baidev die oben genanten sein hantveste vnd avch dev recht dev ez von dem gemainem chavff der gerichte hintz seinen levten vnd gvten hat Daz im daz also stet beleihe vnd vnzerbrochen geben wir im disen brief versigelten mit vnserm insigel zv einem vrchvnd Der ist geben ze Purchavsen da von Christes gepvrt ergangen waren tavsent jar drevhvndert jar darnach in dem sibenzehenten jar an sand Lvcie tag