Charter Document - 02520427

Wir Heinr[ich] von gotes genaden pfallntz graf ze Reyn hertzog in Baiern vergehen offenbar an disem brief daz der ersame abtt von Raitenhaslach nach vnsrer pet lazzen hat Ditrichen dem Nevnhauser ze pawmansrecht drev gut ze Nevforn vnd gehaizzen wir dem abtt vnd auch seinem gotshaus als vns der Nevnhauser gehaizzen hat swann in der abtt oder sein amptleut vercheren wil vnd entstiften ab den guten daz er in daz mit nichtev sol versten vnd svln si daz tvn an sein widerred als einen andern ir pawman Vnd ze vrchvnd diser sache geben wir disen brief nach des Nevnhauser pet versieelten mit vnserm insigel Der ist geben ze Purchausen millesimo CCC septimodecimo an dem liechtmess abent