Charter Document - 02520426

Wir Heinr[ich] von gotes genaden pfallntz graf ze Reyn hertzog in Baiern vergehen offenbar an disem brief daz Reinolt von Gvtenekk nach vnserm rat wizzen vnd willen gegeben hat dem gotshavs ze Raitenhaslach einen halben hof ze Svnnpach der vor halber des gotzhavss waz vnd wan der vorgenant Reinolt den selben hof gar inne gehabt het vnd auch versetzet het mit anderm gut seinem geswein Reichgern dem Gvntzchofer zv seiner swester Margareten hat daz selbe gotshavs ze Raitenhaslach den selben hof ze Svnnpach erlediget vnd erlost von dem Gvntzchofer vmb siben pfunt Regenspurger pfenning Vnd da mit ist der obengenant Reinolt von Gvtenekk vnd gemainleich alle die die an dem hof icht rechtes heten oder gehaben mochten gestanden gar vnd gentzlich von den selben rechten vnd da mit den obengenanten hof ze Svnnpach gegeben dem gotshavs ze Raitenhaslach mit alle dev vnd darzv gehort besucht vnd vnbesucht ze einem rechten selgeret ewichlich ze besitzen an alle ir widerred vnd ansprach Vnd ze vrchvnd diser sache geben wir disen brief nach ir pet versigelten mit vnserm insigel Der ist geben ze Purchavsen millesimo CCC septimodecimo an sand Vincencii tag