Charter Document - 02520425

Ich Reinolt von Guteneck vergich vnd tun chund allen den die disen brief sehent oder lesen hornt das ich gar vnd gantzleich gestanden pin von meinem chrieg den ich lang gehabt han gegem dem gotzhaws vnser frawenn vnd wider abbt vnd die sammung ze Raitenhaslach vmb ein halben hoff ze Sunnpach der vor halber von H[ainreich] dem Zolnar von Landaw dem got genad ze selgrat ledichleichen gegeben was dem vorgenantem gotzhaws hintz Raitenhaslach Vnd wann ich den selben hoff gar han inne gehabt vnd auch in meinem gesweinn Reichgern dem Guntzchouer zu meiner swesteren Margreten mit anderm meinem gut versetzt het hat der erwerig abbt Ilsunch von Raitenhaslach mit meinem rat vnd mit meinem guten willen Reichgern dem vorgenanten Guntzchofer siben phunt Regenspurger pfening gegeben vnd den hoff ze Sunnpach aus seiner gewalt allen weis do mit geledigt vnd erlost Vnd han ich mit meiner lieben frawn vnd mueter gunst Penditen vnd mit meiner hausfrawen Elspeten vnd meiner zwaier sun Reinolts und Gotfritz vnd meiner tochter Anna vnd mit meiner swester gunst meiner swester Jauten vnd auch mit dem willen meines oft vorgenanten gesweins Reichgers des Guntzenchofers vnd seiner hausfrawen Margreten gunst den selben hof ze Sunnpach mit alle dem das dar zu gehort versuechtz vnd vnbesuechtz gantzleichen gegeben vnd mit sampt mir alle die die vor genant vnd gescriben sind zu einem ewigen selgrat dem vorgenanten gotzhaws vnser frawn hintz Raitenhaslach Vnd des furbas chain chrieg vmb den selben hoff oder chain ansprach von chainem vnserm frewnt meg auf gesten han ich dem vorgenanten herren vnd abbt Ilsunch vnd seiner sammung zu einem ewigen vrchunt disen offen brief gegeben verinsigelten mit meines gesweinn Reichgers des Guntzenchofers vnd auch mit mein selbs insigel Der sache sint zeug der erberig abbt Chunrad von Alderspach bruder Hainreich der Toubnar pruder Wahsmut der chelner von Raitenhaslach vnd do selben bruder Fridreich von Piburg Chunrad der Poppenp[er]ger Rudger Poppenp[er]ger Fridreich Poppenp[er]ger Eberhart de Weng Sweigker de Alderspach Wlfinch von Ernstorf Albrecht von Hainreichstorf vnd Fridreich der Darm vnd ander pider lawt mer Der brief ist gegeben ze Alderspach an sand Vincencii tag anno domini MCCC septimodecimo