Charter Document - 02520424

Ich Johans Pfeffigner rihter vnd wir die zwelif genanten vnd auh di gemain purger ze Muldorf geben ze wizzen alle den di disen brief lesen hornt das Pfosse vnd Fridreich sein bruder Seibots sun von Polling dem got genade alle di ansprach vnd chrieg di si heten si wern recht oder vnrecht gegem dem gotzhous ze Raitenhaslach vmb den hof ze Chunihing des si jahhen herren vnd gewern ze haben hern Chunraten den Achaimer gentzlichein in des chelner hant bruder Wahsmutz von Raitenhasl[ach] gesetzt vnd gegeben habent vnd im in sein hant gelobt habent das weder si selben noch dehain ir erib oder freunt furbas dehain ansprach vmb di sahhe nimmer mer gewinnen gegem dem vorgenanten gotzhous Raitenhaslach Do wider hat desselben gotzhous erweriger herr apt Ilsunch in Pfossem vnd Fridr[eich] ze ergetzung gegeben nach seines chelner vnd auch nach seiner samnung rat sehs pfunt pfenning Regenspurger vnd zwen lemberen roch Vnd das di sahhe also stet beleib habent vns Pfoss vnd Fridr[eich] des vleizchlichen gepeten das wir zv einem ewigem vrchunt diser Verrichtung an disen brief vnser stat insigel gehangen haben Der sahhe sint zeuch Chunrat Magens der probst Ott der Zehentner Peter der Purger Engelprecht der Neumaister H[ainreich] der En Ditmar der Schilicher Vlr[reich] der Guffel H[ainreich] der Schonschuster F[ridreich] der Darm Chunr[at] der Titler vnd ander pider leut mer Der brief ist gegeben des nehsten suntag nah sant Johans tag ze sunnewenten anno domini MCCC sextodecimo