Charter Document - 02520422

Ich brvder Ott Seifritstorfer nouitz ze Raitenhaslach vergih vnd tvn chunt alle den di disen brief ansehent oder lesen horent daz ich meinen aigen hof ze Mitterperg der genant ist Maierhofn vnd mein drei aigen hof ze Nevfarn mit samt der vieschwait vnd mit alle dem daz zv den vier hofen gehort besvhtz vnd vmbesvhtz gegeben han ze rehtem selgeret mein vnd meiner lieben hausfrawen Jevten vnd vnser paider veter vnd mvter sel ze hail vnd ze hilf der erwerigen samnung meiner lieben bruderschaft hie ze Raitenhaslach mit sotaner beschaidenhait daz der selben samnung pitantz pfleger oder swem is der herr vnd apt enpfiliht der vier hof gvlt Stift stewer wandel dienst chlain vnd grozzen vnd allen nvtz alle jar ine nemen schol vnd von dem allen schol er der offt vorgenanten samnung ewichleichen alle sabentztag in der vasten vor ostern vmb drei Schilling pfenning viesch oder ein ander pitantz di si als gern haben chauffen vnd geben Dar vber an meiner vorgenanten housfrawen Jevten jarzeit schol er vmb drei Schilling pfenning der samnung viesch chauffen vnd geben Dar vber an der vigili ze pfingsten sant Johannis Baptist sant Peters vnd sant Pauls sant Laurencii vnser frawn schiedung sant Mathei sant Symonis aller heiligen sant Andree vnd an sant Mathie abent vnd vigili schol der vier hof gvlt innemer der samnung ze igleicher zeit vmb ahtzch pfenning viesch chauffen vnd geben Meht aber der vier hof gvlt so verre nicht geraihen daz man ditz selgeret gentzleihn also der samnung geb als hie geschriben stet swo di gvlt abe get do ist weder vnser herre der apt noh der chelner noh der pfleger der hof nicht gepunden dehain pitantz von den hofen ze geben der samnung Wurt aber der gvlt icht mer von den hofen denn hie geschriben ist nah dem schol der pitantz pfleger aber nah seiner gewissen der samnung daz pest tvn daz er mach Dar vber dez ersten tags in der Weisung schol der pitantz pfleger dem weiser geben zwelif pfenning vnd schol der weiser der alt herren vier oder fumf fragen pei der gehorsam ob ditz selgeret also der samnung gegeben sei als vor hie an disem brief ist geschriben oder nicht Swez denn der offt vor genanten samnung hie ze Raitenhaslach nicht gegeben ist daz doh von den vier hofen ine genummen ist daz schol im der weiser geben haissen vnd schol ez hintze Salmonsweier sein selbez samnung pringen vnd geben Vnd das ditz selgeret also ewichleichen stetez vnd vnzeprohhen beleib vnd gentzleichn als geschriben ist gegeben werd habent di erwern herren apt Chunr[at] von Salmonsweier vnd apt Ilsunch hie von Raitenhasl[ach] nah meiner grozzen pflig vnd bett willen mir vnd der samnung zv einem vrchunt disen brief versigelt mit ir paider anhangvnten insigeln Der brief ist gegeben ze Raitenh[aslach] an sant Seruacii tag anno domini millesimo trecentesimo sexto decimo