Charter Document - 02520421

Wir Heinrich Ott vnd Heinrich von gotes genaden pfallentz grafen ze Reyn vnd hertzogen in Baiern verjehen offenbar an disem brief wan vnser getrewer Ott der Seifristorfer dvrich sein vnd seiner vodern hail dem gotshavs ze Raitenhaslach gegeben vnd gewidemt hat dev gvt den hof datz Maierhof bei Mitterperig vnd daz Chobellehen datz Seifritstorf dev er von vns ze lehen het vnd wan wir avch dem selben gotshavs fvdervng vnd genaden schuldich sein haben wir nach Hartl[ieb] des Puchperger vnsers pfleger vnd alles vnsers rates haizzen willen vnd rat dem vorgenanten gotshavs ze Raitenhaslach gegeben dev lehenschaft der obengenanten gvt ewichlich behalten vnd ze besitzen als ander ir aigen gvt Vnd daz im daz stet beleihe vnd vnzerbrochen geben wir im disen brief versigelten mit vnserm insigel tze einem vrchvnd Der ist gegeben ze Lantshvt do man zalt von Christes gebvrt drevzehen hvndert jar vnd in dem sechtzehenten jar an dem pfintztag vor sand Jorgen tag