Charter Document - 02520420

Ich Fridreich der Shefman mavter vnd pvrger ze Pvrchavsen vergich vnd tvn chvnt offenwar mit disem prief allen den di in sehent oder horent daz ich mein gvt ze Vrfar vnder Leonberch auf dem In daz ich von minem heren dem edeln hertzogen Hainrichen ze rehtem lehen han gehabt gegeben han ledichleichen mit allem dem recht daz da zv gehort ze rechtem selgeret miner liben havsfravn Margareten vnser fravn ze Raitenhaslach vnd han ez avfgeselt mit meins vorgenanten liben heren hertzogen Hainrichs hant dem closter ze Raitenhaslach der avch im dev aigenshaft nach miner grossen pet dvrich got ledicleichen hat gegeben Vnd daz dem chloster daz stet vnd vnzebrohhen beleih ewichleichen gib ich im disen prief versigelt mit meinem insigel an den avch nach miner pet sein insigel geleit hat her Gotshalich der ersam ertzprister von Chymse der diser sache vnd gab gezevg ist der avch mit im gezevg sint her Vlreich der pharrer von Lauffen her Hartvnch der pharrer von Fevhten brvder Heinrich der prior brvder Wahsmvt der chellner ze Raitenhaslach Chvnrat Ermrich Fridreich der Aichpech vnd ander frvmt levt Diser prief ist gegeben ze Raitenhaslach do von Christes gebvrt waren tausent drevhvndert vnd fvmftzehen jar dez nehsten tags nach sant Thomans tag