Charter Document - 02520419

Wir Heinrich von gotes genaden pfallentz graf ze Reyn vnd hertzog in Baiern tvn chvnt vnd verjehen offenbar an disem brief daz Friderich der Schefman vnser mavter vnd pvrger ze Pvrchavsen daz gvt ze Vrfar vnder Lewnberch avf dem In daz er von vns ze lehen hat gehabt gegeben hat ze selgeret seiner havsfrawen sei dem gotshavs ze Raitenhaslach mit allem dem recht daz darzv gehoeret mit vnserm gvten willen vnd hat avch im daz avfgegeben mit vnser hant Vnd haben wir nach seiner bet mit vnsers pfleger Hartl[ieb] von Pvochperch vnd vnsers rates rat willen vnd gvnst dev aigenschaft des selben gvtes mit dem erichslag vnd mit allem dem recht daz dar zv gehort dem vorgenanten gotshavs gegeben innerchlichen dvrich got vns vnd vnsern vorvodern ze einem rechtem selgeret Vnd daz dem gotshavs daz stet vnd vnzerbrochen beleihe geben wir im disen brief mit vnserm insigel versigelten Der ist gegeben ze Lantshvt do von Christes gebvrt waren tavsent drevhvndert jar vnd in dem fvmftzehenten jar an sand Thomas tag