Charter Document - 02520417

Ich Lvdweich der alt Grans vergich offenbar mit disem brief daz ich mein haus ze Purch[ausen] daz minner daz ich von grvnt auf gepaun han mit meinem aigenchleichn gvt auf zwo hofstet der ich ainev het gechauft von dem gotshaus ze Raitenh[aslach] vnd di andern di ich chauft von Ermreichn han gegebn vnser vrowen vnd dem vorgenanten gotshaus ze Raitenh[aslach] mit verhengnvsse wizzen vnd gutem willen Chvnegundn meiner hausvrowen vnd aller meiner erbn ze einem rehten vnd ewigen selgeret vnd han ez auf geselt auf fron alter ze gegenburt der samnung vnd paidev pfaffen vnd laien mir vnd meiner hausvrowen vnd aller meiner erben vnd allen meinen voruodern den ich gvets schuldich bin ze selden ze trost ze hail ze leib vnd ze sei Des sint gezevg her Hainreich der oroloymaister her Hainr[eich] der Zeller Vlr[eich] der rihter ze Vttendorf maister Hans der Pvh arzet Ortel des hertzogen chamerer Hainr[eich] der sneider vnd ander erberiger zevgen genvech Vnd daz daz selgeret dem gotshaus ze Raitenh[aslach] ewichleich vnbechrenchet vnd stet beleih gib ich im disen brief versigeltn mit meinem vnd meiner svn Wernharts vnd Perngers insigeln ze aim immer steten vrchvnd Der brief ist geben ze Raitenh[aslach] da von vnsers herren geburt waren drevzehen hvndert jar vnd in dem fumfzehentn jar dar nach an sand Margreten tag