Charter Document - 02520416

Ich Ludweich der alt Grans vergich vnd tvn chunt alle den di disen brief sehent vnd hornt lesen das ich alles des geltz vnd aller der handlung di ich ie mit dem abbt vnt mit dem convent des gotzhous ze Raitenhaslach han ze handeln gehabt mit lehenschaft varents vnd vnvarents gutz swi das genant ist gar vnd gentzlich pin verriht vnd gewert also verr das si mir meiner hovsfrowen noch dehainem meinem erben chlain noch gros nihtes niht schuldich sint beliben Ich vergich ovh offenbar das ich datz dem vorgenanten gotzhous ze Raitenhaslach dehainen perch han noch is meins gutz nihtes niht inn hat chlain noch gros Vnd da von das dem vorgenanten gotzhous dehain ansprach oder chrieg von meiner hovsfrowen noch dehainem meinem erben noch ander iemen mveg ovf gesten gib ich dem ersam abbt vnd seinem conuent ze Raitenhaslach disen brief ze einer gantzen vnd lovtern sihherhait vnd ze einem waren vrchvnt versigelt mit meinem vnd meiner zwaier svn Wernhartz vnd Perngers insigel Diser brief ist gegeben dv von Christ geburt waren drevzehen hundert jar dar nah in dem fumfzehenten jar an sant Margreten tag