Charter Document - 02520415

Ich Hainreich der Polligner vergieh vnd tun chunt alle den di disen brief ansehent das ich vnd mit mir alle meinev chint das sind Chunrat mein sun vnd Margaret Gedrud vnd Mehthilde mein tohter vns gaentzleih verzigen haben aller der ansprah vnd chrieges den wir heten oder gehaben mahten hintze dem gotshous ze Reitenhaslach vmb switan sahhe di gesein maht vnd besunderleih vmb ein gutel ze Polling vor Raitenhaslaher hof do der Mergel auf sitzet das mein aigen gewesen ist vnd mein bruder Meinhart dem got genade an mein wissen dem vorgenandten gotshous vnser frawn hintze Raitenhaslach ze selgeret gegeben het vnd dar vmb zv ainer ergetzung von dem herren der ze den selben Zeiten apt was enpfangen vnd genummen het aht pfunt pfenning Regenspurger Des selben guts ich mich nv anderstunt mit meiner obengenanten chinde wiln vnd gunst vnd si mit samt mir vns verzigen haben vnd vnser frawn hinze Raitenhasl[ach] auh ze selgeret auf gegeben alle haben hat dar vmb der erwerig herre vnd abt Ilsunch mich Hainr[eich] den Polligner geeret mit einem pfunt pfenning Vnd das im furbas von mir vnd meinen chinden di ich ietzunt han oder noh gewinnen mag dehain ansprah oder chrieg niht mer chomen meg han ich in disen brief gegeben verinsigelten zv einem ewigen vrchunt diser sahhe mit dem insigel hern Johans des Pfeffingners des erwern rihters ze Muldorf vnd mit mein selbes insigel Sint auh zevg der sahhe her Chunrat mein bruder der erwer verweser vnd pfarrer von Flossing her Walchun pfarrer von Taufchirchn her Eberhart der Harschircher Chunr[at] der Rauter Ekk Ot der Zehentner Vlreich Guffel Hainr[eich] der En Wernhart der Fritzenwegner Weinmar von Perchaim H der Schonschuster vnd ander pider leut mer Der brief ist gegeben ze Muldorf do von Christes burt waren vergangen tausent jar drew hundert jar dar nah in dem fumfzehenten jar an sant Johannis vnd Pauli tag