Charter Document - 02520413

Wir Heinreich Ott vnd Heinrich pfallentzgrauen ze Reyn vnd hertzogn in Baiern verjehen offenbar an disem brief daz wir mit vnsers lieben herren vnd pfleger hern Ludweiges des Romischen chvniges rat willen vnd gvnst vnd heizzen vnd avch dvrch die genade vnd andaht die alle vnsern vodern zv dem conventte vnd chloster ze Raitenhaslach gehabt habent bestetigen vnd newn dem chloster alle die genad vnd reht vnd vreivng dev si von allen vnsern vodern vber allev ir gerihtt levt gvt vnd vber alle ir vreivng avf dem wazzer vnd auf dem lande in allem vnserm lande habent Wir tvn avch chvnt mit vnsers uben herren vnd pfleger des vorgenanten chvnig Lvdweiges rat willen gvnst wizzen vnd heizzen dev genade dem vorgenanten chloster daz si in vnsern steten daz ist ze Pvrchausen vnd ze Oting ie in der stat ein haus svllen haben in rehter aigenscheftt nvr in den zwain steten alein vreies vnd lediges an alle stewer wahte vnd ander bedwanchsal vnd an alle vodervng swie si geheizzen ist von vns von vnsern vitztvm vnd allen andern amptlevten swie si genant sint vnd fver alle vodervnge vnser purger swer si sein in den vorgenanten zwain steten mit der bescheidenheit also daz si allez ir gvt swie ez genant ist gehandein mvgen in den selben [iren] hevsern mit chaeuffen vnd mit verchauffen allen den weis nach irem nvtze an alle irrvng vnd wider red vnser amptlevt vnd auch vnser purger in den selben egenanten steten swie si genant sein Wir tvn avch dem vorgenanten chloster die genad daz si chost ez sei wein prot chase fvter hawe vnd allen getraide swie der genant ist vnd gemainlich allez daz man zv dem oft genanten chloster oder von dem chloster fvret treibet oder traget si selb oder ir levt daz dem chloster zv gehort ez sei auf dem wazzer oder auf dem lande an zollesteten oder an mavttsteten ze Pvrchausen oder ze Oting ze Hohenwartte vnd gemainlich an allen vnsern zollesteten vnd mavttsteten in vnserm lande daz man si an nihtev irren noch engen sol vnd si an allen zol vnd mavtt vreilich varen lazzen sol an allev irrevng vnd allev ervng die si an den zolsteten vnd mavttsteten von bescheidenheit vnd niht von reht getan habent die nemen wir alle ab vnd wellen vnd gebiten ev allev daz ir si vmb solich vodervng fvrbaz nimmer mere irret noch pfrennget Vnd daz in daz also stet gantz vnd vnzerbrochen beleihe geben wir in disen brief fver vns vnsern liben brvder Otten vnd fver vnsern liben vettern hertzog Heinreichen mit vnserm hertzog Heinreiches grozzem insigel versigelten Vnd ist daz geschehen da von Christes pvrtt waren tavsent jar drevhvndert jar dar nach in dem fvmftzehenten jar des mitichens in der pfingstwochen