Charter Document - 02520412

Wir Heinrich vnd Otte vnd Heinrich von gotes genaden pfallentz graven ze Ryn hertzogen in Baiern vergehen offenbar an dem brief daz wir gesehen vnd gehort haben di hantvest di vnser vorvodern seligen dem ersamen chloster ze Raitenhaslach habent gegeben vnd auch di selben vnser lieber vater vnd veter chvnig Ott von Vngern vnd hertzog Stephan den got genad gesteit vnd genewet habent mit ir brieven vmb di hevser di der aptt vnd aller der conventt dez obe genanten chlosters ze Raitenhaslach in vnsern steten eines ze Purchavsen vnd eines ze Oting haben svllen in rehter aigenschaft an alle stiwere bedwanchsal vnd gemainlich an alle vodervng swi dev sei gehaizzen von vns vnseren vitztvmen swi di sin genant allen andern amptlevten vnd von aller vodervng vnser purger swer di sint oder swi sint genant in den selben steten so daz si allez ir gut in den selben hevseren mvgen wandeln vnd handeln an alle vnser amptlevt vnd purger da selben irrevng dar zv auch alle chost an wein prot fvter hev getraid swie daz sei genant vnd gemainlich allez dez si bedvrfen in dem chloster swaz daz fvrent vber lant avf wazzer an zolsteten oder mavtsteten daz man si dar an niht irren sol vnd in daz freilich an alle vodervng zolle vnd der mavt sol fver gen lazzen Di selben genad vnd freihait durch vnser vnd vnser vorvodern selichait steten vnd nevwen wir mit vnsers lieben herren vnd phlegers hern Lud[weig] des Romischen chvniges willen gvnst vnd haizzen dem selben aptt allem convent vnd dem chloster ewichlich ze behalten vnd wellen vnd gebiten allen vitztvmen rihtern schergen vnd auch purgern ze Purchavsen vnd Oting allen vnsern zolneren vnd mavtneren in di genad stet ze behalten vnd in di an nihtev vber varn Vnd geben ze vrchvnde disen brief versigelten mit vnserm grozzem insigel Der ist geben millesimo CCCXV des svnntages vor sant Jorgen tag