Charter Document - 02520411

Wir Heinr[ich] von gots genaden pfallentz graf ze Reyn vnd hertzog in Baieren verjehen offenbar an dem brief daz vnser gvt wille ist daz vnser getrewer graf Heinr[ich] von Leonberch dem gotshavs ze Raitenhaslach gegeben hat di zwen hof in dem dorffe ze Pebing den mittern vnd den nidern di sein freyes vnd lediges aigen waren mit alle dev vnd darzv gehort ze velde ze holtz ze wismad besvht vnd vnbesvht Vnd zv einer mereren vnd sichern stetichait derselben hof staten wir dem oben genanten gotshavs mit dem brief allez daz daz di hantvest sagt di si von dem oben genanten graf Heinr[ich] habent vber di hof di oben genant sind Vnd daz in daz allez stet vnd vnzerbrochen beleih dar vber ze einem vrchvnd geben wir den brief versigelten mit vnserm insigel Daz ist geschehen ze Pvrchavsen da von Christes gebvrt waren dreutzehen hvndert jar vnd dar nach in dem fvmftzehenten jar an sand Tybvrtzen vnd an sand Valerians tag