Charter Document - 02520409

Wir graf Heinrich von Leonberch tun allen den chunt di disen brief ansehent oder horent lesen vnd verjehen auch offenbar daz wir haben gegebn vnsers vrein vnd rehtes ledigens aigen zwen hof ze Pebing den mittern vnd den nidern in dem dorf mit alle dem vnd dar zv gehort ze veld ze holtz ze wismat besuht vnd vnbesuht swie ez genant ist vnser frowen vnd dem goteshaus ze Raitenhaslach ze rehtem geselgeret vnd ze einer getzung vnd ze einer pezzerung eines hoves vnd einer mul daz frow Agnes vnser muter der got genad pi ir lebentigen het benaihent vnd geben dem goteshaus ze Raitenhaslach daz wir im enpfremd haben vnd haben ez gegebn dem chloster ze Viehtpach Vnd won di vorgenanten hof ze Pebing verchumbert waren vnd stuonden hat si der ersam herre apt Ilsunch von Raitenhaslach mit sines goteshauss gut erlost vnd geledigt von Ebn von Hoholting vnd von Heinr[ich] von Lewprehting vmb siben vnd vierzich pfunt vnd vmb drei Schilling Regenspurger pfenning Vnd da mit haben wir dem vorgenanten apt Ilsunch vnd daz goteshaus ze Raitenhaslach gesetzet in nvtz vnd gewer der voruerschriben hof Pebing in allem dem reht vnd nvtzen ewichlichen ze habn vnd ze besitzen als wir ez vnd vnser vordem habn inne gehabt vnd besezzen Vnd daz vnser frowen vnd dem goteshaus ze Raitenhaslach daz selgeret vnd di hof ze Pebing an chrieg vnd an alle ansprah ewichlich beleih da vber gebn wir im disen brief versigelt mit vnserm hanganden insigel ze einer ewigen festigung vnd ze einem waren vrchund aller diser sache Des sint gezevg her Heinr[ich] pfarrer ze Hierzorn der Techinger Chunr[at] der Seifridesdorfer Eb von Hoholting Heinr[ich] von Levprechting Ditmar der Rigelpekch Seytzel der chamerer Heinr[ich] der Resch vnd Chunr[at] der Schreiber pfarrer datz Zimmern vnd ander piderb leut Der brief ist gegebn da von Christes gebvrt waren drevzehen hvndert jar vnd dar nach in dem funfzehenten jar des montages an sand Tyburtzen vnd sand Valerians tag