Charter Document - 02520403

Ich Vlrich von Attnat richter ze Chuchel tun ze wizzen allen den di disen offenn brief lesent oder lesen horent daz Wernher von Hueb vnd Jacob der Wegistt vor mir auf dem rechten gechlaget hawent daz si bruder Veschalich der nidermaister in dem Hellein irret datz Dornav an einem wege den si ze recht solten hawen zue dem achcher vnd zue dem wismat daz si hieten datz Ehausen in dem velde als verr daz weisum da hin ertailt war de Auf diu weisum chom ich selber mit den nechsten vnd mit den besten vnd mit baiden tailen vnd het bruder Veschalich volligen gewalt von dem gotshaus von sande Peter vnd von dem gotshaus ze Raitenhaslach daz er di chlage solt verantwurten Da wurden zue der bischave geschaffet dreizehen man der eltisten vnd der besten vnd warde den zue dem rechten wider geboten Due sagot daz recht man solt in zue sprechen wes sie gedechten vnd woz in vmme den obengenanten wege wer gewizzen Vnd due si gefraget wurden da sagten si gemainlich auf irn eit daz es also vormalen herchomen wer mit gunst vnd mit lieb daz di obengenanten Wernher vnd Jacob gefaren wem durich diu gazzen datz Dornavo vnd von der gazzen gerehen auf durich den winchel olain mit traide vnd mit hew swann si dem nidermaister oder swer der lehen ze Dornavo pauman ist an allen schaden mochten gefaren daz awer si an des nidermaisters willen oder von recht da faren solten da wer in nicht vmme gewizzen Dar nach sagt frage vnd vrtail daz di obengenanten Wernher vnd Jacob furbaz da nicht mer faren solten an des nidermaisters gunst vnd willen oder des der diu vorgenanten lehen inne hat Da sind bei gewesen bruder Haumbrecht der obermaister Vlrich der Paizz richter in dem Hellein Vlrich der Spech Chunrat der Lodler Ott der Farfler Vlrich der Turn Hinrich der Zerer puriger in dem Hellein vnd ander getriv leut genvege Vnd daz diu obengenant sage vnd recht furbaz also bileib an chriech gib ich ze vrchunde disen offenn brief bruder Veschalichen vnd dem Nidernhof ze vrchunde der warhait mit meinem anhangendem insigel vnd mit Vlreichs dez Paizzen des richters in dem Hellein insigel der daz auch dar an gelegt hat ze vrchunde der oben geschribenn gewizzen Daz ist geschehen nach Christes geburtt vber driuzehen hundert jar in dem driuzehentistem jar darnach an sand Laurentzen tage