Charter Document - 02520401
| Charter Number: | 02520401 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | German |
| Charter Origin: | Lay |
| Charter Type(s): | Agreement |
| Date: | 1313 |
| Date type: | Internal, Feast |
| Resource Link(s): |
Monasterium.net |
Charter:
Ich Lvdweich Grans tvn chvnt allen den di disen brief sehent vnd hornt lesen wan der abtt vnd daz convent des gotshavses von Raitenhaslach oftt vnd dichke ennher mir schvldich ist gewesen beraiter pfenning di ich in gelihen het vnd getraides vnd ander gvt des si mir avch sint schvldich gewesen ich bin in avch schvldich gewesen weines den si mir gegeben heten ziegelstain vnd tvftstain daz habn wir allez gegen einander verraittet vnd swaz des alles baidenthalben ist gewesen daz ist allez ab vnd hin also daz ainer dem andern nihtes mer schvldich ist beliben vntz vf den hevtigen tach Ich sag si avch ledich an disem brief daz si des meinen nihtes niht inne habnt noch in nihtes niht ze behalten han gegebn beraites gvtes noch anders niht Vnd daz avch dar vmb mein svn oder ieman anders von meinen wegen an den vorgenanten abtt vnd an daz conventt niht ze vodern hab gib ich in disen brief ze einem vrchvnd mit meinem insigel vnd mit meiner vorgenanten svn aller insigeln versigelt Daz ist geschehen ze Bvrchavsen millesimo trecentesimo XIII an sant Georii tag