Charter Document - 02520400

Ich Lvdweich Grans tvn chvnt allen den di disen brief sehent vnd hornt lesen daz hern Albrehtes des Vberachres svn Albrecht Johannes Hertneit Ott vnd Elspet ir swester vor mir verjehen habnt offenlichen daz si der abtt von Raitenhaslach her Ilsvnch vnd der conuent des selben gotshavses gewert hab fvmf vnd virzik pfvnd Regenspvrger pfen[ning] div in ir vater berait gelihen het vnd habnt der den abtt vnd daz gotshavs ze meiner gagen gentleich ledich gesagt Si habnt avch mer verjehen daz in der abtt vnd der conuent deheins pfenninges noch dehainer gvlt mer schvldich sei vnd daz si avch gewert sein alles des vnd ir vater vor her dem abtt vnd dem conventt ie gelihen hiet oder bei in ze behalten geben Vnd bin ich avch des also des abtes vnd des conuent gezevch mit samt den andern gezevgen di her nach geschribn Stent Daz sint her Gebhart der alt abtt da selben her Ott der Sachs her Wachsmvt der vnder chelner her Hainr[eich] der Olar subprior her Seybot Schreiber pfarrer ze Nidern Ditfvrtt Hainr[eich] der Pawr purger ze Burchavsen vnd Nyclavs von Stvmbelberch des abtes chneht Vnd ist daz geschehen ze Raitenhaslach millesimo CCCXIII an sant Ambrosii tag