Charter Document - 02520399

Ich Reitz Albretz witib von Messling vnd wir Ekk vnd Ekhart ir baider sun offen vnd tun chunt allen den di disen prief lesent oder horent lesen daz wir bechant haben daz vnreht daz vnser vater hat getan dem gotzhaus ze Raitenhaslach an dem gut Pufftal da vmb er auch christenleicher greb enpiert vnd sein gestanden von allem dem reht chrigen vnd ansprach swie den waz daz wir wanten zu haben auf dem vorgenanten gut ze Pufftal vnd haben iz vreileichen ledich lazzen wider dem gotzhaus ze Raitenhaslach mit allem dem daz dar zv gehort besuechstz vnd vnbesuechstz swi iz genant ist gar vnd gaentzleichen Vnd wan iz vnser vater Albreth verchvmert het vnd versetz daz iz von vns niht machtt erlost werden hat der ersam herre apt Ilsunch ze Raitenhaslach daz offt genant gut ze Pufftal gelost vnd geledigt von Vlreichen dem smit von dem Nevnmarcht vmb drevzehen pfunt pfenning Regenspurger vnd hat auch vns vnd vnser offt genanten muter durich sein besunder gnad der selben mvnss gegeben drev pfunt vnd hat vns dar vber gelubt pei seinem genaden daz er an allez gever erwerben well daz Albreht vnser vater in den vreithof wert bestatt Vnd wan die verrihtigung vnd die verzeihnuss ist geschehen ze Muldorf vnd wir niht aigens insigels heten hab wir die erwerigen purgern vor den disev handlung ist geschehen mit grozem ernst vnd vleiz gebeten daz si dez taidinch ollev als si oben sint geschriben gestetigen vnd geuesten mit der stat insigel Diser sach aller sint gezevg her Vlr[eich] der pfarrer von Nidernperchirichen her Hainrich der rihter Peder Ekk Ott Zehentner Ch[unrat] Wolfoltinger der Aigner der Swertfurib Ch[unrat] Newmaisters aidem der lang Ott Fridreich der Darm Ch[unrat] goltsmit Ch[unrat] der probst von Oberhoven Vlrich der Wintperger vnd ander erberig purger vnd zevg genueg Der prief ist gegeben ze Muldorf da von vnsers herren gepurt warn drevzehen hundert jar vnd in dem drevzehendem dar nach des suntags vor sand Valteins tag