Charter Document - 02520398

Ich Margaret Wolfgreims des Marholtigner dem got genad witib vnd mit mir mein siben svn Hainreich Liebhart Andre Symon Rudger Alber Peter vnd mein siben tohter Alhait Margaret Diemut Elzpet Mehtilt Agnes vnd Alhait offen mit disem brief vnd tun chunt alle den di disen brief sehent oder lesen hornt das wir durih got vnd durih vnser sel gewarhait gestanden sein gentzlichein vnd gemainchlichein von alle dem chrieg vnd ansprah div wir gegen dem erwerigen abt Ilsunchen vnd sein gotshous Raitenhaslach gehabt haben vmb zwoi gut ze Chunihing vnd eins ze Stuzing nah den wir ze vnreht gechriegt haben Vnd das wir vns der vnrehtichait erchent haben vnd von aller ansprahhe lazzen haben hat vns der erwerig vorgenant abt Ils[unch] ze einer minn vnd lieb vnd ze einem besundern gnaden gegeben sehs pfunt pfenning Regenspurger zv dem das vns oder vnserm vater vor von abt Gebh[arten] gegeben was Das aber furbas von vns oder von dehainem vnserm freunt oder nahchomen dehainerlai chrieg oder ansprah dem offt vorgenanten gotshous Raitenhaslah vmb div gut chomen megen geben wir in der sahhe zevg herren Vlreichein den erwerigen pfarrer von Perchirchen Fridr[eichen] den Perger Hainr[eichen] den Marholtigner vnd Marcharten sein pruder di der sahhe zwieschem dem gotshous schietman waren vnd auh vnser Es sint auh zivg der sahhe der Rudolf Johans vnd Vlreich di Chatzpechen Ekk von Muldorf F[ridreich] der Darm Wolfhart von Widem Wolfgreim Laubel Hainr[eich] von Gothalming Chunr[at] Vlreich Ruther von Mosuogel Wernher von Puhpah vnd ander pider levt mer Vnt wan wir selben aigner insigel niht haben haben wir mit vnser starchen pet vnd flig erworven von den erwerigen herren herren Hainr[eichen] dem vicedum von der Rot vnd herren Gerhohen dem Radekker das si disen brief zv einem ewigem vrchunt mit iren insigel gewornt habent Der brief ist geben an sant Agathe tag anno domini MCCC tercio decimo