Charter Document - 02520397

Ich Vlreich Murzeer offen vnd tun chunt alle den di disen brief sehent oder lesen horent das ich mit meiner housfrowen Herraten vnd meins suns Hainreichs vnt meiner tohter Gerwirgen vnd mit ander meiner freunt gunst vnd gutem willen meiner sel vnd auh aller meiner voruodern vnd nahchomen sel ze selden za hail vnd zv einem ewigem selgeret gegeben han meines rehten aigens ein gutel datze Chirihperg genant ist ledichleichein vnd freileihen vnser frowen dem gotshaus hinze Raitenhaslach Dar vber von besunder gnaden niht von dehainem reht hat mir mein herre der erwerig apt Ilsunch von Raitenhaslach vnd sein samnung lassen alein mein ains leib ze poumansreht irer gotshous ein gut das Poumgarten genant ist mit sotaner beschaidenhait das ich in das dienen schol vnd alle jar von dem selben gut in an allev vrsah hin haim hinze Raitenh[aslach] auf den chasten geben vnd antwrten sibenzehen metzen chorns sibenzehen metzen habern vnd zwen metzen waitz Es wer denn als vil das gemain pisess oder schawer des lands gewesen wer so schol der dinst an meins hern des apts gnaden sten Swelihs jares auh ich mein vorgenanten dinst versitz das ich den vor der stift niht gegeben han so ist das gut von mir ledig warden vnd schol ich meinen vorgenanten herren allen mein dinst vergwissen vnd schol mein herre der abt oder sein amptman sein gut ze Poumgarten freileichen stiften als ander seins gotshous freis aigen mit swem er wil Es hat auh denn noh ietzunt noh nah meinem tot weder mein housfrow noh dehains mein chint noh dehainer meiner freunt ihtesiht ze sprehhen oder ze chrigen nah dem gut ze Poumgarten wan ich is alein ze mein ains leib ze poumansreht von im han gehabt noh nah meinem selgeret ze Chirihperg wan ich is ledichleichein vnser frowen hintze Raitenh[aslach] gegeben han Vnt zv einer ewigen stetichait dirr sahhe han ich mit meiner pet vnd flieg erworuen datz herren Hainr[eich] dem Ganzen erwern vicedum von der Rot das er disen brief ze vrchunt versigelt hat mit seinem insigel Dar zv habent auh mein zwen freunt Peter der rihter von Piburch vnd Marchart der Morholtingner auh disen brief mit iren insigeln ze vrchunt gestetigt Diser sahhe sint auh zeuch Fridr[eich] der Darm Vlreich von Roreh Hainr[eich] von Gothalming Chunrat der probst von Pfeffing Chunrat der goltsmit Nycola von Stumelperg Ch[unrat] der Herzog Vlreich Ruther Chunrat der mulner von Mosuogel Wolfhart von Widern vnd ander pider leut mer Der prief ist gegeben an sant Vincentii tag anno domini MCCC tercio decimo