Charter Document - 02520396

Ich Ott von Purchsteten offen vnd tun chunt alle den di disen brief sechent oder lesen horent das ich willichlichein durih got vnd durih meiner sel vnd auh aller meiner vorvodern vnd nahchomen sel gewarhait hail vnd seld gestandem pin von allem chrieg vnd mich verziegen han aller der ansprah di ich gehabt han hinze dem erwerig abbt vnd dem chloster ze Raitenhaslah vmb dev zwoi gilt ze Serling di dem vorgenanten chloster vor meinen vorvodern ze rehtem selgeret ledichleichein gegeben sint nah den ich gechrigt han das man sev nah meinem rat vnd nah meinem willen vnd auh mit meinem leuten stiften scholt Vnd derselben verzignusse sint zevgere der erwerig abbt Ilsunch von Raitenhaslah her Vlreich von Oting sein chelner her Fridr[eich] sei chamerer her Hainreich der Huter sein Schreiber Marchart der Marholtigner Hainr[eich] sein veter Vlreich der Murzerer Vlreich der Swertfurib Seibot vnd Asprian von Serling Fridr[eich] der Darm Vlr[eich] von Roreh H[ainreich] von Gothalming Ghunr[at] von Pfeffing vnd ander pider leut mer Vnd das dem vorgenanten chloster von mir oder von dehainem meinen nahchomen dehain mv oder ansprach furbas meg auf gesten vnd ich selben niht aigens insigels han han ich erworuen mit meiner pet das her Hainr[eich] der Gans vicedum von der Rot vnd her Lud[weich] der Grans vnd mein sweher her Seibot von Mitterchirchen zv einem vrchunt habent disem prief verinsigelt mit ir insigel Der prief ist geben an sant Lucie tag anno domini MCCC duodecimo