Charter Document - 02520393

Ich Chunrat Pouman ze Pupftal mit samt meiner housfrowen Jevten vnd meinen svnen Liebharten Wilhalmen Vlreichen vnd Chunr[aten] vnd meiner tohter Elspeten verjehen vnd tun chunt alle den di disen brief lesen horent oder sehent das wir alle gemainchlichen gestanden sein von alle dem chrieg vnd ansprah div wir vntzen an den heutigen tag gehabt haben vmb dev hub ze Pupftal vnd switan schaden wir von den erwerigen ebten ze Raitenhaslach vnd irer samnung oder amptleuten oder von dem pann dar in wir chomen waren enpfangen haben genzleichein in dev hant vnd gnad des erwerigen apt Ilsunchs aitzweis gegeben haben Des hat der vorgenant apt Ils[unch] von Raitenh[aslach] mit samt seiner samnung vns genadet vnd habent vns di selben hub ze Pupftal sehs jar lassen ze poumansreht also daz wir in die ze dem tritail alle jar dienen schuln allen weis als wir sei vor dem smit von dem Neunmarcht gedient haben aber nah den sehs jaren schuln si di hub mit vns oder mit andern swem si wellent stiften freileihein als ander ires gotshous aigen gut vnd haben weder wir noh dehainer vnser freunt oder nahchomen dar wider dehain reht oder ansprah iht ze chrigen Vnd zv einer festen stetichait dirr sahhe haben wir mit vnser pett vnd vlieg erworven von herren Hainr[eich] dem Ganzen erwern vicedum von der Rot vnd von herren Gerhohen dem Radekker daz si disen brief versigelt habent mit iren insigel Der sah sint zevg herre Hainr[eich] der pfarrer von Schonperg her Vlr[eich] pfarrer von Perchirchen Rudolf der Chatzpech Frid[reich] der Huber F[ridreich] Darm Ch[unrat] der probst von Pfeffing Ch[unrat] der Puntschuh Wilhalm H[ainreich] vnd Ch[unrat] sein svn Vlr[eich] der Zeiligner Ott von Chunihing vnd ander pider leut mer Der brief ist geben an sant Vincencii tag anno domini millesimo CCC duodecimo