Charter Document - 02520390

Ich Heinr[eich] von Ryed der Ahaimer offen vnd tvn chvnt allen den di disen brif sehent oder horent lesen daz der erber herr vnd abtt Gebh[art] von Raitenhasla mit samt seiner samnvng dvrch meiner flig dinst vnd fvdervng willen minen zwain dinern Wernharten vnd Gebharten den zwain brvdern die genant sind Chamerer seinen aigen hof Wising vnd dar zv ein gvtel haizzet Od ze pawmansreht lazzen hat mit allem dem daz dar zv gehort besvht vnd vnbesvht doch mit so getaner beschaidenhait daz ze dem ersten aller der chrieg vnd anspache den si Wernhart vnd Gebhart vnd ander ir brvder oder frevnt vmb den vorgenanten hof Wising habent gehabt allen weiz hin sol sein vnd alle di weil si beid oder ir ainer lebt svllen si den hof Wising vnd dev od ze pavmansreht haben vnd mit zimmer mit paw pavlichen legen vnd alle jar an sant Michels tag fvr dinst fvr stewer fvr lantschvld fvr chlein vnd fvr gros ein pfvnt Pazzawer pfenning hintz dem chloster dinen vnd bei ir selbes boten dahin senden Versavmten si aber nach sant Michels tag XIIII tag daz pfvnt pfenning ze geben so sind si von allen ir reht gevallen vnd ist der hof vnd die od an allen chrieg dez gotshavs von Raitenhasla ledigs vnd freies aigen ze geleicher weiz avch nach ir baider tod so ist der hof vnd od dem gotshavs ledich worden vnd svllen weder ir havsfrowen noch ir erben noch dheiner ir frevnd dar an dhein reht chrieg oder ansprache haben Der sache sind zevg Ch[unrat] mein Schreiber Heinr[eich] der Mewerl Frid[reich] der Darm Heinr[eich] der Tren Ch[unrat] der Rvmpler vnd ander bider levt mer Daz ist geschehen an sand Michels tag anno domini MCCC undeci M Vnd ze ainer steten vestichait han ich den brif versigelt mit meinem insigel