Charter Document - 02520387

Ich Meinhart von Polling offen vnd tun chunt alle den di disen prief sehent oder lesen horent das ich mit meiner lieben housfrowen verzeihnusse vnd auh mit meins lieben herren vnd bruders hern Chunrats des erwern Verwesers sant Peterschirchen rat vnd gunst geben han vnser frowen dem gotshous vnd der erwern samnung ze Raitenhaslach zv einem ewigen selgeret mein ledigs vnd aigen gutel ze Polling do der Mergel auf sitzet vor Raitenhaslaher hof mit alle dem das dar zv gehort Do wider hat der erwer apt Gebhart mich do mit begnad vnd hat mir mit seiner vorgenanten samnung willen gegeben zv einer ergetzung aht pfunt Regenspurger pfenning Vnd das das vorgenant mein selgeret dem vor offtgenanten gotshous Raitenh[aslach] an allen chrieg vnd ansprach ewichleich vnd ledichlichein beleih han ich in zv einem furpfant gesetzt switan schaden si von dem seigerast enphahen das si den haben schullen auf alle meinem gut vnd hab Vnd gib in des zevg vnd vrchunt disen brief verinsigelten mit der erwern stat von Muldorf insigel Diser sahhe sint zeug der edel riter her Eberhart der Chalp Ekk purger ze Muldorf Hainr[eich] der Mewer Walther von Dorffen Wolfel der Schutz der Gossenperger der Schalihner Peter der amptman von Ering F[ridreich] der Darm vnd ander pider leut mer Der prief ist gegeben des ersten suntags in der vasten anno domini MCCC undecimo