Charter Document - 02520385

Ich Fridreich von Praunaw vergih vnd tun chunt allen den di disen brief lesent oder horent lesen das ich willichlichein vnd ledichleichein zv einem ewigem selgeret mein selbs vnd meiner housfrowen frowen Offmey der got muez genaden vnd aller meiner vorvoderr sel hail vnd seld han gegeben vnser frowen hinze Raitenhaslach dem erwern apt Gebharten vnd seiner samnung allev meinev aigen gut si sein verlihen oder niht verlihen vnd alle mein aigen leut es sein frowen oder mann Des ersten ban ich in geben mein hub ze Vberechen dev Dornperch ist genant zv einem ewigem selgeraet mit wismat mit vieschow vnt mit alle dem das dar zv gehort gesuht vnd vnbesuhts Dar zv han ich in geben mein aigen hub auf dem perg div Leupolts des Stainhouers suns erib ist von der er in dienen schol alle jar fumf Schilling pfenning Otingner vnd alle jar stewern nah gnaden vnd ze weiset geben zwai huner zwen ches zwo semeln sehtzich aier Han auh in gegeben mein aigenschaft meiner aigen hvb ze nidern Ah di der vorgenant Leupolt von mir hat gehabt ze lehen vnd ein hub ze Odenhousen di der Seifritstorfer von mir ze lehen hat gehabt Ein hvb ze Retenpuh div Chunrat des forstmaisters chneht von mir hat gehabt vnd do selben ein hvb di Meingos von mir ze lehen hat gehabt Ein gutel Hainreichs Staders lehen vnd ein akcher vnd ein garten div Hainreich in der Holtzgassen von mir ze lehen hat gehabt Dar zv in der Aw ein wis di Hertel mit mir gemain hat gehabt vnt ein wis di der Templ haist div Ranshofer mit mir gemain habent gehabt Da selben Alrams von Egerten wis di sein erib ist vnd zehen pfenning dient vnd ein wis div Hainreich von Revt vnd der Odenhouser von mir ze erib habent vnd X pfennig dient vnd ein wis div Charl vnd sein geswei von mir ze erib habent vnd zehen pfenning dient vnd ein wis div Fridreich von Ah vnd Rudger vnd Seibot sein bruder von mir ze erib habent vnd zehen pfenning dient Da selben Seibots wis an dem Eklehen div sein erib ist vnd zehen pfenning dient vnd Hertleins wis von Ah div sein erib ist vnd zehen pfenning dient von mittrist alsam zehen pfenning dienst do selben dreizich pfenning gult di Fridreich hern Meingoss svn von mir ze lehen hat gehabt vnd ist genant der Leupoltinnlehen In der Aw des Smits von Gunthering wis ist sein erib vnd dient dreizich pfenning Do selben Ditmars wis von Swal div sein erib ist vnd dreizich pfenning dient Das ist alles mein reht vreis aigen vnd han es ze rehtem selgeret dem vorgenanten gotshous vnd der samnung ze Raitenhaslach ledichlichein geben mit sotainer beschaidenhait das si alle jar des nehsten tags vor vnser frowen abent in der vasten mein selbes jarzeit swenn ih nimer pin vnd auh frowen Offmeyn meiner housfrowen meines vaters hern Fridreichs von Prownaw vnd meiner muter frowen Petersen von Stefning jarzet scholn pegen vnd schol ichleicher herr vnd bruder an dem selben tag sunderleihein getrost werden mit zwoin stuchen viesch vnd mit einem trinchein weins Vnd swenn das ist das mein ablai ist swo das ist inderhalb zwainzich meiln do schuln si mich mit ir selbs wagen vnd zerung selben raihen vnd in irem chloster pei mein vorvodern ze der erd bestaten Ich vergih auh vnd offen is an disem brief das ich in den zwoin jaren sider das ich nehst mit meinem herren vnd ohaim apt Gebh[arten] vnd mit der samnung abraitat vnd in do selben auh mein selgeret gab vnd mit erwern ziuchen vnd mit meinem prief vnd insigel gestetigt pin schultig warten vmb chorn vnd wein vnt auh das si fur mich vergolten habent zehen pfunt Regenspurger vnd drei Schilling pfenning der si auh mit meinem heutigem selgeret das hie an disem brief geschriben stet schuln gewert sein Vnt das in das vnzeprohhen vnd stet ewichlichein beleih gib in vrchunt vnd zivg disen brief verinsigelten mit meinem insigel Der sahhe sint zivcher her Eberhart mein ohaim der Chalp Frid[reich] hern Meingos svn zv Vberechen Ott von Hering Leupolt der Stainhover Frid[reich] vnd Ott mein zwen chneht Ortlib von Puhsing vnd Engelpreht der Leschenprant des apt chneht vnd ander pider levt mer Der brief ist gegeben anno domini millesimo trecentesimo decimo an sant Bartholomei tag