Charter Document - 02520382

Wir Ott von gotes genaden kvnich ze Vngern vnd wir Stephan pfallentz grafn ze Reyn hertzogen ze Beieren verjehen offenbar an disem brief daz wir dvrch vnsers hails willen vnd durch den willigen dienst den vns der erwerg abtt vnd der conuent ze Raitenhaselach ie gedient habnt swenn wir dez an si begert habn vnd auch noch gern vns dienent habn wir in gegebn vnd verschaffet ze einer ergetzvng swaz wir dienstes von ir levten genomen habn von vnsern ambten ze Hall fumf hundert pfvnt Regens[pvrger] pfenning also daz man si ze dem nechsten sand Michels tag wer vnd verrichtt hvndert pfvnd pfenning Regens[pvrger] vnd dar nach ze dem nehsten in der quatemper dev da ist in der ersten vast wochen hvndert pfvnt vnd dann von der selben quatemper furbaz vber ein gantzes jar fumftzich pfvnt vnd fur sich also jerlich an derselben quatemper in der vasten alle jar fumftzich pfvnt vntz si mit rechter raittvng der genanten fumf hvndert pfund verrichtt vnd gentzlich gewert werden Wir habn auch in vnseren getrewen Lud[weig] den Grans vnd sinev chint ze einem pfleger vnd ze voderer der vorgenanten pfenning gegebn vntz si gentzlich gewert werden nach der zeit als obn verschribn ist Vnd daz in daz stet beleib geben wir in den brief versigelten mit vnsern insigeln Der brief ist gegebn ze Lantshut millesimo CCC nono an vnserer frawn tag in der vasten als sie bechvnnt wort