Charter Document - 02520381

Ich Fridreich von Torring erchenne das vnd offen es mit disem brief das ich vnreht geweist was vmb di zwo hub ze Altentorring vnd ze Perchaim di dev Seifridswurerinn von den herren vnd dem gotshaus ze Raitenhaslach ze leibding vntzen an iren tot het inne gehabt vnd nah ir tot mich derselben hub ze vnreht vnderwnten het vnd in dar an gewalt vnd vnreht getan han das mir nu laid ist von gantzem meinem herzzen Vnd das mir der erwerig apt Gebh[art] mit samt seiner samnung vergeben habt geloben ich im pi minen trewen das ich das mit meiner fuderung vnd mit minem scherm di weil ich leb hinz dem gotshaus verdienen wil Vnd das in von mir furbas oder von dehainem anderm meinem erben oder freunt dehain ansprach oder schaden von meinen wegen gescheh gib ich im vrchunt disen prief verinsigelt mit meinem insigel Der brief ist geben do von Christes burt waren vergangen tausent drev hundert jar dar nah in dem neunten jar an sant Gregorii tag in der vasten