Charter Document - 02520380

Ich Chunrat rihter von Oting vnd mit mir her Sybot der Mitterchircher maister Hainreich von Oting Geiselperger her Hainr[eich] der Pahner rihter ze Purchusen her Eberhart der Chalp von Purchusen fumf erwerig riter meiner herren der fursten von Baiern offen vnd tun chunt alle den di disen prief sehent oder lesen horent das ein chrieg was zwischen herren Ortlibs von Wald vnd des epts vnd gotshaus vnser frawn ze Raitenhaslach vmb den Prantwert pi der Altz gegen Schutzing vber mit dem das vorgenant gotshaus Raitenhasl[ach] erst gestift was vnd hundert jar vnd mer an allen chrieg in nutze vnd in gwer inne gehabt het des her Ortlib von Wald das gotshaus an reht entwert het vnd mit gewalt an alles reht wol sehzehen jar inne het Des cham is dar zv das her Ortl[ib] von Wald hintze Rom varen wolt fur sein sunt das der erwerig apt Gebhart mit der samnung in ermonten vmb den Prantwert als ferre das her Or[tlib] schuef mit seinem rihter dem Puhpechen vnd im sein selbs voln gewalt gab ze gwinn vnd ze flust das mon auf den Prantwert mit dem reht ein Weisung haben schult mit den nehsten vnd gewegsten vnd den pesten di dar vmb gesessen wern vnd swem di den Prantwert sagten mit ir aid vor dem reht des schult er sein Des wart vor mir Chunr[at] dem rihter von Oting vnd vor vns fumf vorgenanten ritern vor dem reht pi dem aid der Prantwert dem gotshaus Raitenh[aslach] gesagt von Hainr[eich] von Mitterhausen Wernharten von Stegen Vlr[eichen] in Poumgarten Vlschalich von Puesing H[ainreich] von Ehmuting mitterlehner Ekken von Schutzing Ditmaren am Veld Vlr[eichen] von Altzperg vnd sint das di nehsten vnd di pesten di dar vmb gesessen sint Der sahh vorsprech was des apts Gerunch der chamerer von Oting vnd anweiser Chunrat der Talweger gegen dem Puhpechen den rihter vnd dem Alchigner herren Ortlibs probst Diser sahh sint auh zevg her Ot von Viehausen Ch[unrat] der chastner der Winner von Oting Alber der Pharrchircher Seifrid der scherig Fridl der schefman Perhtolt vnd Gerhart von Ehmuting H[ainreich] des Prunner sun Frid[reich] der Talweger Liebhart des Plumberger sun Walchun der Stempher H[ainreich] der scherig von Moring H[ainreich] der forster Wernhart der forster F[ridreich] der Darm H[ainreich] der Tren vnd ander pider levt mer di pi dem reht alle warn Dar vber zv einem ewigen vrchunt diser Weisung vnd sahhe han ich Chunr[at] der rihter von Oting mit samt den vorgenanten ritern disen prif verinsigelten mit vnsern insigel Der prief ist geschriben vnd di sahh ist geschehen anno domini MCCC nono des vreitags vor mittern vasten