Charter Document - 02520379

Ich Alphart ich Tanchwart vnd ich Seifrid wir drei bruder von Ditmenning verjehen vnd tun chunt alle den di disen prief sehent oder lesen horent das wir durich got auf di gnad auh vnd auf di fuderung des erwerigen apt Gebharts vnd seins conuents von Raitenhaslach vns gentzleichein verzigen haben aller der ansprach di wir hinze in gehabt haben vmb das gut ze Chregling vnd dar vmb ze gnaden vnd ze lieb hat vns der vor genant erwerig apt G[ebhart] vnd sein samnung geben drew pfunt Salzburger phenning Dar vber offen auh wir an disem prief das wir ein ansprach auh heten hintze dem vorgenanten gotshaus vnd samnung ze Raitenhaslach vmb etzwiuil phenning di vnser vater dem got genad do hin der samnung schuld haben ze ehalten geben der selben ansprach haben wir vns auh gantzleichein verzigen wan wir des wol geweist sein daz wir der samnung vnd dem gotshaus Raitenhaslach vnreht dar an haben getan Vnd do von haben wir vmb di sahhe des offt vorgenanten erwerig apt Gebh[arten] vnd seiner samnung gnad vnd huld mit vnser freunt hilf vnd pflig gewnnen Vnd das wir furbas dehainerlai ansprach icht hinze dem gotshaus Raitenhaslach haben geben wir in disen prief versigelten mit dem insigel des erwerigen landrihters hern Wernhards des Zuchswerts von Dietmenning wan wir aigens insigels selben niht haben Der sahhe sint zeuch her Ilsung der prior her Hainreich der portner her Ot der custer her Fridr[eich] der chamerer her Chunrat der Vogel her Vlreich der chelner herren vnd bruder ze Raitenhaslach her Chunrat der Lamp Hainr[eich] der Smerpech Hainr[eich] der Mewer Symon der Schreiber Ch[unrat] der Freioltsmoser Merten der chamerer Fridreich Chrophel Furter des Zuchswerts chneht Eiler von Fridolfing Stolz Fridreich der Darm H[ainreich] der Tren H[ainreich] der Puhs vnd ander pider leut mer Der prief ist geben ze Ditmenning do von Christes burt vergangen waren dreuzehen hundert jar dar nah in dem ahten jar an sant Michahels tag