Charter Document - 02520378

Wir Eberhart von gotes genaden brobst Paul techent vnd allez capitel ze Berthersgadem verjehen vnd offen an disem prief allen den di in sehent oder horent lesent daz wir den ersamen vnd gaistleichen herren dem conuent ze Raytenhaslach vnd irn pflegern des siedens ze dem Hellein pruder Chunratn dem Wienner vnd pruder Vlschalhen erchennen fumftzich chlafter die si in vnserm perig vnd aigen geworiht habent daz dazselbe vnserr vorvodern vrlaub gewesen ist vnd auch im vnser wille ist vnd darzv erlauben wir in noch furbaz ze varen in derselben schaftriht dreizzich chlafter zv den zehenn di si vor nach den vorverschriben fumftzich chlaftern an vnser wizzen geworiht heten mit sogetaner beschaidenhait daz si in denselben viertzich chlaftern paun schullen zwai sinchwerich vnd niht mer auf ainer want oder auf paiden swederhalb in daz fugleich ist vnd sullen derselben viertzich chlafter mit den zwain sinchwerichen vnd mit ainer wer ob si wellen nach perchweriches reht nizzen so si maist mugen an daz si dehain cherwerich weder vnder sich noch neben sich haben noch varen sullen wan di rehten schaftriht mit den zwain sinchwerichen di in erlaubet sint Vindent si daselben ehern nach ir willen daz ist vns lieb wer des niht daz ist vns lait doch ist schad vnd frum ir Wer aber daz si stain oder vrische irret daz sullen si zeitleich vmbeuaren also daz si an di lenge iht mer varen danne di vorgeschriben viertzich chlafter vnd desselben perges als verre wir in den hie erlaubet haben mit den setzen di hie verschriben sint sullen wir ir rehte gewern sein swa vnd swenne si des bedurfen an aller der stat da wir daz durch reht tun sullen Tet aber in darvber iemen gewalt daran des got niht geb des wellen wir in niht gepunden sein Vnd darvmb daz wir in daz erlaubet haben habet si vns vnd di vnsern geeret mit drein vnd dreizzich pfunden Salzburger pfenning Vnd daz furbaz diser gewerft in vnd vns stet vnd vnzebrochen beleih geben wir in disen prief versigelt mit vnsern insigeln Disev sache ist geschehen do von Christes geburt waren dreutzehen hundert jar vnd darnach in dem ahten jar an san Alexen tag