Charter Document - 02520377

Ich Chunrad von Chuchel vergich vnd tun chund mit disem brief allen den dy in ansehent oder horendt lesen daz ich meinem getrewn diener Gotschalken von Goling vnd auch seinen erben ez sin sun oder tochter verlihen han ze rechten lehen ein gut ze Jaerdorff da der Sneider auf siezet vnd ist sechs Schilling geltes vnd in dem Wenge ein gut haisset Vnrates hub vnd ist ein pfund geltes vnd in dem Igelspache nevn zehenthaus vnd han auch in dy vorgenanten gut verlihen in allen dem recht also man recht lehen ze recht leichen sol baidev versucht vnd vnuersucht vnd bin auch der selben gut ze recht ir herre vnd ir gewer wo in dez not geschiecht Vnd daz in daz state vnd auch gancz von mir beleihe dez gib ich in disen brief versigelt mit meinem insigel ze einem waren vrkunde vnd ze einer ganczen statichait Vnd sind dez geczeugen herr Chunr[at] von Teysing vnd Chunr[at] sein vetter von Teysing vnd Chunr[at] von Stegen vnd Chunr[at] der Prenner vnd Fridreich der probst auz der Fricze vnd Ruprecht von Storrcech vnd Hainr[eich] von Reut vnd Virich der Melchaimer vnd Hainr[eich] der Aichorner vnd Wernhart der Schreiber vnd ander ir zeuge den ez auch war gewissen ist Vnd ist daz geschehen nach Christus gepurd tausent jar drew hundert jar in dem achten jar an vnser frawn tag in der vasten