Charter Document - 02520376

Ich Fridreich Prownawer vergieh vnd tun chunt allen den di disen brief lesent oder horent lesen das ich durich got vreileihein vnd ledichleichein zv einem ewigem selgeret mein selbs vnd aller meiner vorvoderr sel hail vnd seld di lehenschaft meines rehten vnd ledigs aigens das ist datz Chasten ein hof den Ott der Morigner von mir hat ze lehen gehabt datz Vtting ein halbev hub Chunigsperg ein hub auf der Fleh dreizzich pfenning gult di Hainreich der Mewer von mir hat gehabt ze lehen ze Retenpuh enhalb des holtz pei Chunichs aih ein hub vnd hie dishalb ein hub di di Morigner von mir ze lehen habent gehabt ze Prukk ein wis vnd ze Hopferspach ein wis di auh di Morigner von mir ze lehen habent gehabt ze Adelpuh hie dishalben des holtz ein hub vnd enhalb datz dem Struzzel ein hub in der Peunt ein hub pei Hopferspah vnd ze Podem auf dem Ernperg ein hub di Ott Gerharts Stakken sun von mir ze lehen hat gehabt ze Oed an dem Ernperg ein gut mit wismat vnd mit alle dem das dar zv gehort di der Stakk von mir ze lehen hat gehabt das alles mein rehts aigen ist han gegeben vnser frowen ze Raitenhaslach dem erwern herren apt Gebharten vnd seiner samnung vnd han auh dev gut allev aufgeselt auf vnser frowen alter ze der gegen aller samnung vnd in gestetigt mit den erwern zevgen vnd mit disen offen brief verinsigelten mit meinem insigel Der sahhe sint zivch her Ilsung prior her Vlr[eich] der Gruntner subprior her Wernhart der alt guster her Hainr[eich] der custer her Hainr[eich] der chelner her Vlr[eich] Muldorfer vnderchelner ze Raitenhaslah her Hainr[eich] der Pahner rihter ze Purchusen her Eberhart mein ohaim der Chalp rihter datz Otting her Vlreich der ersam pfarrer von Halspah Seibot der Zingk von Purchusen Wernher von Aih Fridr[eich] der Darm Hainr[eich] der Gwikker Ich vorgeschribner Fridr[eich] Prawnawer erchenn auh das vnd vergieh sein an disem brief das der erwer vorgenant apt Gebhart mein ohaim vnd sein samnung ze minne vnd ze lieb vmb disev sahhe vnd von ir besundern gnaden mit chorn vnt waitz mit habern mit speis mit wein mit pfenning vnd mit ander beraitschaft gegeben habent sehs pfunt pfenning Regenspurger Disev sahhe ist geschehen vnt diser prief ist gegeben ze Raitenhaslach des jares do von Chriestes geburt waren vergangen tausent jar vnd drew hundert jar dar nah in dem sibenten jar an sant Pancratii tag