Charter Document - 02520375

Wir Stephan von gotes gnaden phallntzgraf ze Reyn vnd herzog ze Bairn tun chunt alle den di disen brief lesent oder horent lesen das wir mit gutem willen von besundern gnaden vnd lieb di wir haben hintze dem erwerigen abbt Gebharten vnd zv dem gotzhaus sein hintze Raitenhaslach durich den gotzdienst der tegleichs do geschieht haben gegeben ledichleichen vnd gentzleichein im dem vorgenanten abbt G[ebharten] vnd dem gotzhaus Raitenhaslach ze selgeret vns vnd vnser lieben hausfrawen frowen Jevten vnd aller vnser vorvodern vnd nahchomen sei ze troest vnser reht aigenschaft ze leihen den hof ze Anger den von vns ze lehen hat gehabt Ott der jegermaister vnd zwai gut ains datz Nunnrevt vnd ains datz Zainach dew Ott von Moring von vns ze lehen hat gehabt mit alle dem das zv dem selben hof vnd zv den vorgenanten zwain guten ze reht gehort besueht vnd vnbesueht Vnd schullen auh di gut gehoren zv dem lieht das iz gebezzert wert do von Vnd als si den hof vnd di gut inne gewiennent so schulen si des gotzhaus reht aigen sein mit alle dem reht vnd vreitum den ander ir gotshaus aigen vnd gut habent vnd geloben si bescherm als ander ir gut durich den besunder dinst den si vns tuent Vnd dar vber geben wir in disen brief versigelt mit vnserm chlainem insigel Der ist gegeben ze Purchausen anno domini millesimo CCC septimo an sant Pangratii tag