Charter Document - 02520374

Ich Ortlieb von Hag mit samt meinem bruder Hainreichein vergehen an disem brief vnd tun chunt alle den di disen brief horent oder lesent das wir vns des niht gewissen sein das wir dehain reht haben oder megen gehaben noch herren noh gewern imens megen sein des zehents ze Talhaim wider das gotschaus vnd di samung ze Raitenhaslach imen ze leichein Vnd do von durich vnser baider sei gewarheit das dem vorgenanten gotshaus Raitenhaslach von vnsern wegen dehain mv oder ansprach von iemen icht aufste vnd ich Hainreich Hager noch aigens insigel niht enhan geben wir in disen brief an vnser paider stat mit dem insigel meins Ortliebs von Hag Der brief ist geben anno domini MCCC septimo Marci ewangeliste