Charter Document - 02520373

Ich Vlreich Galle purger ze Muldorf vergieh vnd tun chunt alle den di disent brief lesent oder hornt lesen das ich mit gutem willen meiner hausfrawen Alhaiten vnd meines suns Andres vnd auh mit dem willen meines bruders chint Chunrats des Gallen di genant sint Ekhart vnd Chunrat vnt mit dem willen meiner zwoier tohter Elspeten vnd Agnesen vnd mit dem willen vnd gunst ander meiner frewnt han durich got vnd durich mein reht vnd grossen notdurft ze chauffen geben dem erwerigen abbt Gebharten vnt sinem gotzhaus ze Raitenhaslach mein rehts aigen zwai gut der ains haist ze Chopel lehen vnd das ander pi der Strazz mit alle dem das dar zv gehort besuhts vnd vmbesuhts fur rehts mein ledigs aigen vmb drewzehen phunt vnd vmb sehs schilling Regenspurger allen weis mit dem leutchauf vnd mit allem geding Vnd wan mein zwen sun Ludweich vnd Vlreich vnd meines vorgenanten bruder sun Johans pi dem lande niht ensint so sint an der selben stat purgen warten fur allev ansprach mein aidem Peter vnd Chunrat mein aidem vnd Seibot mein bruder also doch vnd mit sotainer beschaidenhait swenn das ist das sih di vorgenanten chint verzeihent aller ansprah hintz dem vorgenantem gut das si den ledig sint der purgenschaft vnd alles geluds Der selben sahh fur di offt vorgenanten chint sint auh purgel mein vor genant hausfraw Alhait vnd mein tohter Agnes fur allev ansprah Vnd wan disev sahh vor meinem herren herrem Geroch dem Radekger vnd vor dem erwerigem pharrer dem Lampotigner herrem Wernhern vnd vor den zwelifen genanten pvrgern ze Muldorf vnd mit ir rat geschehen ist vnd mit ander purger do daz auh der chauf vnd disev sahhe dem vorgenanten ersam abbt G[ebharten] von Raitenhaslach vnd seiner samnung stet vnd vmbechrencht beleih vnd zv einer ewigen erchantnuss habent si disen brief verinsigelt mit ir selber vnd mit der stat insigel Diser sahh sint zevg di vorgenant herren her Geroh der Radekger her Wernher der pharrer her Hainreich der Polligner Johans sein svn Fridreien Hollir Ekk Engelpreht der Neumaister Peter des Peihaims aidem Reisch des Tanners bruder Chunrat der zwelifer Langott Fridr[eich] der Lang Ot der Zehenter Chunr[at] der Voriher der Guglingner Vlr[eich] der Wimperger vnd ander bider levt mer Diser brief ist geben do von Christes burt waren tausent drew hundert jar dar nah in dem sibent jar des nehsten mitichens nah ostern