Charter Document - 02520371

Wir abbt Vlreich mit aller vnser samung von Raittenhaslach verjehen vnd thun kunt allen den dye disen briff lesen oder horent lesen das vns der edel ritter her Jacob von dem Turn durch seiner seel hail vnd auch aller seiner vorvoderen vnd nachchomen vreunt salichait hat gegeben dreizich march silbers mit sotaner beschaidenhait das wir alle jar an sant Leonhartstag an dem seins vater jarczeit ist der selben samung ein pfunt pfenning vmb visch geben schullen dye weil er der vorgenant Jacob lebt aber nach seinem todt schullen wir das selb pfund pfenning geben ewigleichen der vorgenantem samung vmb vische an dem tag sein selbs jarczeit Dar vber geben wir im auch gemain vnd seiner hawsfrawen vnd seinen sun lembtigen vnd toten rechter bruderschafft vnd aller der gutet die ewichleichen in dem gotshawss ver der samung got erpoten wirtt Vnd das disew gab von einem iegleichen abbt ewichleichen geben wert vnd stat beleih geben wir in disen briff verinsigelt mit vnserem insigel Diser briff ist gegeben do von Christes purdt waren tausent drew hundert jar darnach in dem sechsten jar an sant Mathie tag